Dënohen 4 ish-oficerë serbë për ekzekutimin e një gazetari Dënohen 4 ish-oficerë serbë për ekzekutimin e një gazetari
Një gjykatë në Serbi dënoi me burgim katër ish-oficerë të inteligjencës për, siç u tha, vrasjen e një gazetari të shquar më 1999, i... Dënohen 4 ish-oficerë serbë për ekzekutimin e një gazetari
Një gjykatë në Serbi dënoi me burgim katër ish-oficerë të inteligjencës për, siç u tha, vrasjen e një gazetari të shquar më 1999, i cili ishte kritik ndaj regjimit të Sllobodan Millosheviqit.
Sllavko Quruvija, pronar dhe kryeredaktor i dy gazetave të pavarura në atë kohë, u qëllua jashtë shtëpisë së tij në Beograd, më 11 prill, 1999, pak ditë pas fillimit të fushatës së bombardimeve të NATO-s, që ndali luftën e Serbisë në Kosovë.

Gjykata në Beograd dënoi të premten ish-kreun e sigurimit shtetëror, Rade Markoviq, dhe ish-udhëheqësin e inteligjencës në Beograd, Millan Radonjiq, me nga 30 vjet burgim.

Markoviq është duke shërbyer tashmë një dënim prej 40 vjetësh burgim për vrasje të tjera politike.

Gjykata dënoi me nga 20 vjet edhe dy ish-zyrtarë të inteligjencës, Ratko Romiq dhe Mirosllav Kurak. I fundit ndodhet në arrati.

Gjykatësja Snezhana Jovanoviq u citua nga mediat lokale duke thënë se katër burrat u shpallën fajtorë për vrasjen e gazetarit Sllavko Quruvija “me urdhër të një personi të panjohur”.

Familja e Quruvijës e ka akuzuar Millosheviqin për urdhërimin e vrasjes, shkruan REL.

Millosheviq është arrestuar në vitin 2001 dhe është dërguar në Tribunalin e Hagës për Krime Lufte, nën akuzat për gjenocid dhe krime të tjera të luftës, të kryera gjatë shpërbërjes së ish-Jugosllavisë, në vitet 1990.

Millosheviq ka vdekur në paraburgim të Tribunalit më 2006, përpara se të merrej ndonjë vendim për të.